الخميس، 20 ديسمبر، 2012


أهلا فسهلا أحبائي المطشحونين، وكل سنه وانتوا مش موافقين ..مش موافقين علي إيه هو في فايده بلا نيله ياختي ما الراجل قال عليا الطلاق مافي فايده يعني يعمل ايه الراجل يطلع من هدومه ....ماعلينا مش حانتكلم في السياسه بقي.. النهارده الكريسيمس وأفراح وكده هون وكل سنه وانتوا متقسمين ..يادي النيله وسوادي بمبه ماعلينا ..البت جارتنا بقي اللي قولتلكوا عليها المره اللي فاتت وكانت حزينه ربنا فتح عليها من وسع واتجوزت ميهندس قد الدنيا وأنا اللي كانت صعبان عليا وخلصت الحلقه عليها وضيعت وقت الحلقه ..يالله يالله مانجبش في سيره الناس مالناش دعوه ..احنا النهارده حانودع سنه فاتت وحانستشقبل سنه جايه أأأأإيللي عايز يجيب لخطيبته هديه ماشي واللي عايز يجيب لمراته الأولانيه ماشي واللي مش عايز يجيب حاجه ماشي ...كله ماشي النهارده مش كده  يا ابو التكاتك اصل المخرج بتاعنا بغض النظر يعني إذاعتنا تحت بير السلم انما المخرج ابن ناس سواق اشهر توك توك فيكي يا مصر ...عايزين نعرف حكاويكم وبلاويكم مع السنه القديمه ميستنيين تلافوناتكم وإيميلاتكم وملاياتكم وإسانساتكم علي إذاعه (f إيه الريحه دي )بسي قبل مانيستقبل أول تلافون حانسمع مع بعض أغنيه مصطفي كامل (كل سنه وانت حبيبي) بس قبل مانسمع ماقولكوش البت صباح امبارح كنا بنتخانق ع الشريط بتاع مصطفي كامل اللي مسجلاه البت موني بنت الحاج بهلول بتاع الانابيب بس علي مين اخدته منها اسيبكوا بقي مع الفاصل الغنائي ......ورجعنا تشاني لأحبائي واصحابي واخواتشي يا اخواتشي ...ورجعنا مع المخرج ابو التكاتك احلي توك توك فيكي يا جمهوريه مصر العربيه والمحليه..وجالنا ايميل حالا بالا رقيق رومانتشيكي من المدعو( حماده لاسع)كاتب شعر وبيقول يا ريت حد يكتشفوا قبل ما يتقدم علي الإنتشحار لأنه ساب حبيبته واتخطبت وبعيد عنكوا ندم بعد كده ومش لاقي حاجه يعملها غير انه يشتغل علينا..الشعر رقم مليون وواحد بيقول  
سبته ليه
                                                      
كلمه رايحه همسه جايه 
                                                      
سبته ليه
                                                     
قلبي يللي فرحان حبيبك
                                                    
 سبته ليه
                                                    
يللي كنت في يوم زليلي
                                                    
سبته ليه
                                                   
نمله تايهه نمله بايره
                                                   
سبته ليه

ونقول شكرا للأخ (لاسع)ونقوله ايه اللي دخّل النمل في الموضوع يا ابن اللسعه ....
                 ..........................
وجالنا تلافون الوقت من الأخ (زغلول المدب) ونقول الو 
:ألو.. مساء الخير يا ست
:مساء الخير يا خويا ده ايه ده
:كنت عاوز اقول مشكلتي مع السنه القديمه
:ومالوا مايخسرشي بردوا
: انا كنت متجوز واحده ومهنيا آخر مهننه
:وبعدين
:وبعدين هربت  من البيت حافيه من غير شبشب 
:دي شكلها كانت بتحبك اوي.. بس السؤال فين يا اخسلانس
:انا عايز اسأل يا تري حاترجع تاخد الشبشب ولا لأ
:والله حسب نوع الشبشب يعني لو النوع غالي ممكن ترجع  هو نوعه ايه يا اخ بومباي..الو الو هو راح فين ياختي ده يمكن بيشوف نوع الشبشب ولا نزل يسأل صاحب محل الشبشب.. يمكن بردواالناس أسرار
                     ........................
وجالنا تلافون تاني من المدعوه (مش عارفه انا عايزه إيه) ونقول آلو 
:الو
:الو يا ختي الو
:انا بصراحه يعني عندي ذكريات يعني الليمه يعني شويه يعني
:يعني يعني يعني وبعدين
:انا حاقولك بإختصار وكده هون 
:ماشي
:انا عامتشن بصحا من سته الصبح وبعدين بعمل شندوتشات لبويا وامي وكده هون وبنزل الشغل بتاعي اصلي باشتغل في مصلحه التلافونات وكده هون وانا عامتشن بركب الاتوبيس بس ساعات بركب الميكروباظ وكده هون وساعات الاقي حد يعاكسني وكده هون او يبصلي سواق الميكروباظ عامتشن ،بس انا مش باهتم وكده هون بس بردوا بتضايق عامتشن وببقي مبسوطه وكده هون فكده هون علي عامتشن............

اعزائي اصحابي واخواتشي الشريط سف وكده هون وعامتشن كل سنه وانتوا طيبين لنا لقاء آخر في نفس الميعاد علي تردد محطتتنا واللي حايتوه ينزل المحطه اللي بعدها ..الايميل
comسيفونwww
إذاعه (f إيه الريحه دي) 
    
     
 

هناك 6 تعليقات:

  1. مبرووووك على المدونه الجديده شكلها يجنن وانا اول واحده تترك تعليق للذكره يارب تبقى وش الخير عليكى وكلامك يوصل للدنيا كلها
    الاسكتش يجننن ضحكت من قلبى يا سكره انتى عايزين من ده كتثير وفى انتظار الجديد دائما

    ردحذف
  2. هون هون هون مش فاهم يعنى ايه هون بكلامك هههههههههه
    وانا معجب بالازاعة جدا هههههههه
    وعام جديد سعيد عليكم يارب

    ردحذف
  3. مبرووووك يافنانة

    الاوذاعةالجديدة ديت وعوقبال كدة ماتعمليلك محطة عالساتولايت

    مدونة دمها خفيف جدا

    وننتظر جديدها

    ردحذف
  4. الأخت الكريمة مبروك على افتتاح هذه المدونة
    وأقدم اعتذارى لتأخر فى المجىء إلى هنا
    مع كل التمنيات الطيبة لك بالتوفيق والنجاح

    بارك الله فيك وأعزك

    ردحذف
  5. انا جيت هنا بالصدفة على فكرة :)
    الف مبروك الاذاعة الجديدة
    ربنا يسعدك يا كارولين زي ما ضحكتينا كلنا هنا

    ردحذف